Mariing iginiit ni Gen. Poquiz na hindi siya uurong sa laban kontra katiwalian, kasabay ng panawagan na papanagutin at ipakulong ang mga opisyal na sangkot sa korapsyon sa loob at labas ng pamahalaan.
Sa isang buong panayam, sinabi ni Gen. Poquiz na malinaw ang kanyang mandato: linisin ang hanay ng serbisyo at tiyaking hindi mananaig ang mga abusado sa kapangyarihan.
“Hindi ako titigil. Walang kaibigan, walang kakilala—kapag may ebidensiya ng korapsyon, dapat managot at makulong,” mariing pahayag ni Gen. Poquiz.
Ayon sa heneral, matagal nang ugat ng kahirapan at kawalan ng tiwala ng publiko ang sistematikong korapsyon. Aniya, panahon na upang tapusin ang kultura ng palakasan at protektahan sa mga tiwaling opisyal.
Ibinahagi rin ni Gen. Poquiz na may mga kasong kasalukuyang iniimbestigahan at may ilan nang nasa advanced stage, bagama’t tumanggi muna siyang magbanggit ng pangalan upang hindi maapektuhan ang proseso.
“Hindi pwedeng puro salita. Kailangan may resulta. Kung kailangan kong tapusin ito kahit mag-isa, gagawin ko,” dagdag pa niya.
Umani ng halo-halong reaksiyon ang pahayag ng heneral. May mga grupong nagpahayag ng buong suporta, habang may ilan namang nananawagan ng transparency at pagbabantay upang masiguro na ang kampanya laban sa korapsyon ay hindi magiging selektibo o politikal.
Sa huli, iginiit ni Gen. Poquiz na ang kanyang laban ay hindi para sa sarili, kundi para sa sambayanang Pilipino.
“Serbisyo ang sinumpaan namin, hindi pagyaman. At sisiguraduhin kong may mananagot,” pagtatapos niya.
.jpg)
0 Comments